كم لوح شمسي بتحتاج لبيتك؟ حسبة بسيطة بالأرقام من فاتورة الكهرباء
من رقم واحد على فاتورة الكهرباء بتقدر تعرف تقريباً حجم المنظومة اللي بتلزمك، وكم لوح، وكم مساحة سطح. هاي الطريقة خطوة بخطوة.
الخطوة 1: اعرف استهلاكك الشهري بالكيلوواط ساعة
على فاتورة الكهرباء في رقم اسمه الاستهلاك (kWh). الأفضل تاخذ معدل آخر 12 شهر، لأن الاستهلاك بالصيف (مكيفات) غير عن الشتاء (تدفئة وسخان). إذا ما عندك كل الفواتير، خذ معدل 3 أشهر مختلفة.
الخطوة 2: احسب استهلاكك اليومي
مثلاً بيت بيستهلك 600 kWh بالشهر، يعني تقريباً 20 kWh باليوم.
الخطوة 3: كم بينتج كل 1 كيلوواط ألواح في فلسطين؟
فلسطين من المناطق المشمسة، والإشعاع الشمسي اليومي بالمعدل بين 5.4–6 kWh للمتر المربع. بس اللي بيهمك هو الإنتاج الفعلي للمنظومة بعد كل الخسائر (حرارة، غبار، كوابل، إنفرتر).
للحسبة رح نستعمل رقم محافظ بالنص: حوالي 4.4 kWh باليوم لكل 1 كيلوواط (يعني تقريباً 1,600 kWh بالسنة). الإنتاج بالصيف أعلى بكثير من الشتاء: الإشعاع في حزيران حوالي 8.4 وفي كانون الأول حوالي 2.6 kWh/م² باليوم[1].
الخطوة 4: احسب حجم المنظومة وعدد الألواح
عدد الألواح = (حجم المنظومة × 1000) ÷ قدرة اللوح بالواط
مع الألواح الحديثة بقدرة 620–685 واط (مثل Jinko Tiger Neo 620W وAIKO Stellar 685W) بتحتاج ألواح أقل ومساحة أقل.
أمثلة جاهزة
| الاستهلاك الشهري | اليومي | حجم المنظومة | ألواح 685 واط | ألواح 620 واط |
|---|---|---|---|---|
| 300 kWh | 10 kWh | ≈ 2.3 kWp | 4 ألواح | 4 ألواح |
| 600 kWh | 20 kWh | ≈ 4.5 kWp | 7 ألواح | 8 ألواح |
| 1000 kWh | 33 kWh | ≈ 7.6 kWp | 11 لوح | 13 لوح |
| 1500 kWh | 50 kWh | ≈ 11.4 kWp | 17 لوح | 19 لوح |
هاي أرقام تقريبية للتخطيط. الرقم النهائي بيعتمد على اتجاه السطح وميل الألواح والظل، وعلى نوع النظام وشروط شركة الكهرباء بمنطقتك.
الخطوة 5: كم مساحة سطح بتلزمك؟
اللوح الواحد من هالفئة مساحته حوالي 2.7 م². يعني كل 1 كيلوواط ألواح بياخذ تقريباً 4 م² من مساحة الألواح نفسها. على السطح المستوي بنركّب الألواح بصفوف مائلة، وبين الصفوف لازم مسافة حتى ما يعمل الصف الأمامي ظل على اللي وراه، وخصوصاً بالشتاء لما الشمس واطية. لهيك المساحة الفعلية على السطح المستوي بتكون تقريباً ضعف مساحة الألواح.
بتقدر تحسب المسافة الصح بين الصفوف لسطحك من أداة حساب الظلال والمسافة بين الصفوف.
الخطوة 6: اختيار الإنفرتر
- القدرة: عادة قريبة من قدرة الألواح. مثلاً منظومة 5 kWp مع إنفرتر 5 kW.
- الفاز: إذا عدادك أحادي الفاز بتاخذ إنفرتر أحادي (مثل GoodWe ES)، وإذا ثلاثي الفاز بتاخذ ثلاثي (مثل GoodWe ET-L).
- النوع: شبكي (On-Grid) أو هجين مع بطاريات (Hybrid). اقرأ الفرق بين الأنواع وأيهم بناسبك.
بدك حسبة أدق؟
جرّب حاسبة المنظومة على موقعنا: بتدخل استهلاكك وبتطلعلك المنظومة المقترحة والتوفير المتوقع. أو ابعتلنا صورة الفاتورة وصورة السطح على واتساب وبنحسبلك ياها.
بدك مساعدة بمنظومتك؟
ابعتلنا صورة فاتورة الكهرباء أو صورة السطح، وبنرد عليك بحسبة واقتراح مناسب.